Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.

The brume, the brier, the birken bush,
Bloom bonnie o'er thy flowery lee,
An a the sweets that ane can wish
Frae Nature's han, are strewed on thee.

Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.

Far ben thy dark green plantin's shade
The cushat croodles am'rously,
The mavis, doon thy buchted glade,
Gars echo ring frae ev'ry tree.

Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.

Awa, ye thochtless, murd'rin gang,
Wha tear the nestlin's ere they flee !
They'll sing you yet a cantie sang,
Then, oh ! in pity let them be !

Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.

Whan winter blaws in sleety showers,
Frae aff the Norlan hills sae hie,
He lichtly skiffs thy bonnie bow'rs,
As laith tae harm a flow'r in thee.

Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.

Though fate should drag me south the line,
Or o'er the wide Atlantic sea,
The happy hours I'll ever mind
That I, in youth, hae spent in thee.

Thou bonnie wood o Craigielee,
Thou bonnie wood o Craigielee,
Near thee I pass'd life's early day,
An won my Mary's heart in thee.